Trikobakteryoz : yon enfeksyon ki bay move sant anba bra ak nan pati entim yo

Kisa trikobakteryoz lan ye ?

Se yon enfeksyon ki koze pa yon bakteri yo rele Corynebacterium Tenuis. Enfeksyon sa touche plim anba bra e pafwa sa ki nan pati entim yo. Trikobakteryoz lan parèt tankou se yon krèm blanch oubyen jòn ki kouvri plim yo.  Nan peyi dayiti, yo konn di moun sa gen bil.

Enfeksyon sa touche tout moun, men gason gen tandans plis genyen l pase fanm paske medam yo raze plim anba bra yo pi souvan. Ou jwen enfeksyon sa plis lakay moun ki twò gwo, moun ki swe anpil, ak moun ki gen move ijyèn.

Kijan trikobakteryoz lan manifeste l ?

Trikobateryoz lan pa bay okenn senptom e li pa danjere. Men gen yon seri siy ki ka pèmèt yon moun konnen li gen enfeksyon sa :

• Anba bra mouye epi k ap bay move sant 
• Swè jòn, rouj oubyen nwa
• Swè ki tache sou rad
• Yon bagay blanch sou pwèl yo, tankou yon krèm
• Pwèl k ap rache nan zòn ki malad yo

Kijan trikobakteryoz lan kapab trete?

Trikobakteryoz lan ka disparet byen vit si moun ki genyen l nan byen swiv trètman yo epi li byen pran swen kò l.

Jeneralman, doktè konn preskri yo krèm antibyotik pou pase nan zòn lan. Li kapab krèm klindamisin (clindamicine) oubyen eritwomisin (erythromycine).

Krèm sa ta dwe aplike 2 fwa pa jou pandan 2 semèn sou zòn ki anten lan.

Si trètman sa pa mache doktè yo konn mete moun nan sou konprime antibyotik pou bwè.

Anplis trètman ak medikaman yo, moun sa dwe pran swen pati ki enfekte yo tankou :

• Lave pati sa yo chak jou ak dlo epi savon
• Asire l pati sa yo byen seche avan li mete rad
• Itilize savon ki kont bakteri

Trikobakteryoz lan pa yon kalamite e anpil moun fè esperyans ak li. Lesansyèl se pran swen pati ki enfekte yo, asire yo byen seche epi respekte prensip ijyèn yo.