Kisa ki lakoz yon fi gen doulè lè lap fè bagay?

Fè bagay gen yon gwo enpòtans nan lavi anpil fanm, li fè yo santi yo byen nan po yo e bay yo  konfyans nan tèt yo. Malerezman genyen yon kategori fanm ki paka jwi plezi fè bagay charye dèyè l. Gwo doulè, gratè l se sèl mo yo jwenn pou dekri pratik sa.

Gwo spesyalis nan laswenyay rele pwoblèm sa yo Dispareni (Dyspareunie).

Dispareni konn koze anvi  fè bagay lakay fanm sa yo diminye oubyen disparèt. Yo pa janm ka dous alevwa pou yo ta satisfè. Li konn rann fanm sa yo tou pa janm vle fè bagay ankò, e pèdi konfyans nan tèt yo.

A. Dispareni: Esplikasyon, tip ak koz

    A.1. Definisyon

Dispareni se non lasyans itilize pou dekri tout doulè moun ka genyen lè yap fè bagay, pi presizeman lakay medam yo.

Doulè a kapab nan yon ti zòn oubyen li gaye nan tout pati entim fanm lan. Doulè a ka deyò oubyen andedan bouboun lan. Li kapab parèt tankou yon demanjezon, sansasyon boule, pikotman oubyen kranp.

A.2. Tip dispareni yo

 Doulè yo konn vini nan plizyè moman nan fè bagay la, se rezon sa ki fè spesyalis yo dekri plizyè tip dispareni :

1) Dispareni sipèfisyèl:  Doulè a kòmanse depi lè peni an fèk ap rantre andedan bouboun lan.

 2) Dispareni pwofon: lè sa doulè a rete tout pandan rantre sòti peni an, sa konn menm rive li fè anba vant fanm sa fè l mal.

A.3. Koz dispareni yo

Kòz dispareni yo anpil. Yo kapab  konsène yon pwoblèm ki gen nan yon ògàn nan kò moun lan ( Yo rele yo  "koz òganik") oubyen sòti nan lespri moun sa (yo rele yo "koz sichik").

Kòz òganik yo se sitou :

•  Fanm ki gen enfeksyon jinekolojik oubyen irinè.
• Fanm ki gen kèk reyaksyon alèjik. 
• Fanm ki gen andometriyoz.
•  Fanm ki rive nan peryòd menopoz yo.
• Fanm ki te gen gwo blese lè yo tap akouche oubyen fè kitaj. 
• Fanm ki gen fibwòm epi kèk lòt timè nan sistèm lan.

Koz sichik yo konsène fanm ki strese oubyen pè lè yo pral fè bagay. Pafwa se lè fanm sa pa byen eksite sa ki lakòz bouboun lan pa ase mouye e sa ka bay gwo doulè. Men doulè sa yo ka konsène fanm ki gen move souvni tankou yon fi premye eksperyans li te movè oubyen te sibi vyòl. 

B. Trètman dispareni an

Trètman dispareni an varye pa rapò ak orijin oubyen koz li. Si koz la sichik se yon sikològ pou moun lan wè. 

Men si koz la òganik se trètman kay doktè ki enpòtan. Pa egzanp si se yon enfeksyon ki koze dispareni an, nan ka sa se enfeksyon an ki pou trete epi dispareni a ap tou trete.

Rapò seksyèl se yon aksyon enpòtan nan lavi moun, ki dwe gen anpil sansasyon. Yon moun pa gen dwa paka jwi byen pratik sa ka pote nan lavi l. Devan tout doulè nan fè bagay li enpòtan pou l wè doktè paske l pa dwe konsa.