Lota : tout sa w dwe konnen sou enfeksyon sila

Lota se yon enfeksyon sou po ki koze pa yon chanpiyon yo rele "Malassesia".  Yo rele maladi sa nan lang fransè Pityriasis versicolor. 

Chanpiyon sa prèske lakay tout moun, men li plis devlope kay kèk moun plis pase yon seri de lòt.  

Lota a parèt sou fòm tach oubyen plak sou po a. Tach sa yo ka pi klè oubyen yo pi fonse pase rès po a. Tach sa yo ka parèt nan kou, sou zepòl e nan pwatrin,  men yo ka pwopaje nan lòt pati nan kò a. Tach sa yo pafwa konn grate.

Lota a touche tout moun kenpòt koulè po w, nasyonalite w ak fanmi w. Senpleman an fonksyon de koulè po moun ki gen maladi an, tach ki lye ak li yo ka plis parèt lakay youn ke yon lòt. 

Yo pi fasil jwenn Lota kay moun ki rete nan zòn ki fè cho, oubyen ki gen twòp imidite, moun ki gen anpil grès sou po l , moun kap swe anpil, moun ki gen estrès ak fanm ansent.

Lota kapab trete avèk medikaman antifonjik tankou krèm oubyen losyon (Kétoconazol, Miconazole) ke w pase sou kote w wè plak yo. 

Doktè  konn bay medikaman pou w bwè nan ka pi grav yo oubyen lè yo ap fè ale-vini.

Trètman lota ka pran tan paske li se yon enfeksyon ki kapab pèsiste, se sa k fè l enpòtan tou pou w swiv tout sa doktè di w sou trètman e swen po w pou anpeche yo retounen.

Anplis medikaman yo, pou anpeche lota yo retounen, li enpòtan pou w kenbe yon bon ijyèn pou kò w tankou: 

•  itilize chanpou (Shampoo) antifonjik souvan;
• evite mete rad ki twò sere k ap fè w swe anpil;
• kenbe po w pwòp , byen seche kò w lè w finn benyen;
• evite pataje atik pèsonèl ak lòt moun; 

An rezime,  Lota se yon enfeksyon po nou rankontre souvan e ki ka trete fasilman  avèk antifonjik yo.

Li enpòtan pou pran prekosyon  pou yo pa retounen e kenbe po w bèl. Si w panse w gen Lota, konsilte yon Medsen dèmatològ pou yon dyagnostik ak trètman apwopriye.