Panari: kisa ki lakoz enfeksyon sa?

Panari (pannari) se yon enfeksyon moun konn genyen nan tèt dwèt yo oubyen zòtèy yo. Enfeksyon sa souvan tabli kòl ozalantou zong yo oubyen anba zong ki nan tèt dwèt oubyen zòtèy yo.

Panari a koze pa yon bakteri ki rele stafilokòk dore (staphylocoque doré).  bakteri sa renmen rete sou po moun. Se ant 2 ak 5 jou aprè bakteri a fin tabli kòl anba po dwèt oubyen zòtèy la enfeksyon an pral kòmanse.

Koman bakteri a fè antre anba po a? 

Bakteri a rantre anba po a se lè gen yon ti blese moun nan konn pa menm santi nan dwèt oubyen zòtèy la. Gen plizyè fason moun nan ka pran ti blese sa a, pa ekzanp : lè moun ap netwaye zong yo, si moun lan rache ti po nan dwèt la li ka koze ti blese, oubyen yon ensèk pike moun lan nan zòn lan, elatriye......

Sepandan moun ki bwè alkòl anpil, moun ki fè sik (al li maladi sik/dyabèt), moun sistèm defans kò a fèb gen plis risk pou gen enfeksyon sa. 

Kijan enfeksyon sa manifeste? 

Lè enfeksyon an ap kòmanse ant 2 ak 5 jou apre bakteri a fin antre anba po a, dwèt oubyen zòtèy la vin rouj, gen yon sansasyon tankou ozalantou zong lan ap detire. Tèt dwèt la oubyen zòtèy lan ap vin gonfle paske gen pi (pus) ki fèt, lap cho épi l ap lanse moun sa.

Kék tan aprè enfeksyon an ap bay gwo doulè nan zòn li ye a epi moun lan ap gen sansasyon zòn ki enfekte a ap bat.

Kisa yo fè pou panari ?

Panari pa difisil pou trete, retire pi a (drainage), panse l epi yon antibyoterapi konn sifi.

Sepandan, yon panari ki pa trete ka bay kèk konplikasyon grav tankou flegmon (phlegmon) e menm enfeksyon nan zo kote ki te enfekte avan. Se sak fè vaksen antitetanik yo konn enpòtan tou.