Tout sa w dwe konnen sou enfeksyon ak H. pilori

Enfeksyon ak H. pilori sanble vin yon pwoblèm ki touche anpil ayisyen dènye jou sa yo. Menmsi nou pa rive jwenn chif  sou enfeksyon sila a, bon sans ak eksperyans pèmèt nou konprann se pa de-twa grenn ayisyen k ap plenyen lakòz kalamite y ap pase ak maladi sa a. Pami ayisyen sa yo, Géraldine Monfiston se youn nan yo. Eksperyans li ak maladi sila a kite move gou nan bouch li.

Yon jou pandan m ap dòmi, m santi yon gwo doulè nan mitan biskèt mwen epi mwen mal pou m respire. Jou swa sa m panse se pwoblèm kè mwen genyen. Se lè m al kay doktè m, li di m li pwobab pou se H. pilori m fè paske kè m pa gen anyen.  Epi aprè ekzamen yo konfime se ak H. pilori mwen enfekte.

Kisa H. pilori an ye? 

H. pilori an se yon bakteri ki bay maladi. Non konplè l se Elikobaktè pilori (Helicobacter pylori), se non sa syantifik ki te wè l pou premye fwa yo te chwazi ba l pote.  Youn nan espesyalite bakteri sa se viv nan lestomak moun. Jeneralman anpil lòt bakteri paka reziste ak asid ki deja nan lestomak lan, men H. pilori an rive jwenn yon fason pou l rete la e repwodui tèt li.

Elikobaktè pilori an sòti nan poupou ak krache moun ki te deja enfekte ak li pou l ale chita kò l sou tout objè ak manje ki te gen kontak ak poupou oubyen krache sa. Pou l rive nan lektomak yon moun se vale pou moun sa vale l. Kidonk n ap konprann vale l lan pa difisil sitou nan peyi kote kondisyon ijyèn yo pa respekte.

Ki konsekans enfeksyon ak h. pilori an ka genyen sou lestomak yon moun ? 

H. pilori an ka koze yon pil ak yon pakèt pwoblèm andedan lektomak moun ki enfekte ak li. Premyeman, li koze lektomak moun sa anfle, se sa doktè yo bay pote non Gastrit (Gastrite). Pi souvan moun lan pa santi anyen nan faz enflamasyon sa. Men sa konn rive li gen doulè oubyen li santi l jennen lè l finn manje. Dezyèman, H. Pilori an responsab 80% ka ilsè nan estoma (ulcère destomac). Nan ka sa doulè yo vin pi fò. Twazyèman, rechèch yo moutre enfeksyon ak H. pilori miltipliye risk pou yon moun gen kansè nan lestomak. 

Kijan yo fè wè si yon moun enfekte ak H. pilori  ?

Se doktè ki di moun si yo enfekte ak H. pilori. Pandan konsiltasyon an, l ap fin tande sa moun lan di l santi, epi l ap bay moun sa fè ekzamen laboratwa. Pami tout ekzamen ki ka fèt pou wè si yon moun enfekte ak H. pilori, gen omwen 2 nan yo doktè nan peyi dayiti konn bay fè ase souvan : ekzamen poupou ak ekzamen san. Anplis gen sa yo rele Andoskopi (Endoscopie) an, ki pèmèt doktè a wè ak yon ti kamera, nan ki eta andedan lestomak moun sa ye. Ekzamen sa yo pèmèt pèsonèl sante yo chache siy ki moutre aklè bakteri sa prezan nan lestomak moun lan. 

Ki medikaman ki trete H. Pilori an ?

Tretman H. Pilori an chita sou plizyè kategori medikaman :
 

• Medikaman ki pou redwi asidite lestomak lan tankou: Omeprazol, Esomeprazol, elatriye...
• Medikaman ki pou touye bakteri sa (antibyotik) tankou: Amoxiciline, Clarithromycine, Metronidazol elatriye... 

Doktè an ap chwazi epi fikse dòz medikaman sa yo daprè eta moun ki devan l lan. Jeneralman trètman an pote bon rezilta, men pafwa li konn echwe lakòz bakteri an reziste ak yo oubyen moun lan pa rive swiv li jan doktè an rekòmande l. Se poutèt sa trètman H. pilori an mande pou moun k ap pran l lan sousye de tèt li.

Menmsi enfeksyon sa a ka kondwi ak lòt maladi, trètman l pa mande anpil bagay. Volonte geri an se gentan yon premye pa. Geraldine Monfiston te rive travèse etap maladi sa, menmsi se ak anpil prensip. 

Mwen tèlman pran prekosyon pou m geri sa. M te vin pa manje nenpòt kote, m pran medikaman yo san manke yon jou. Moun ki te konnen m te ka temwanye janm te vin mete lòd ak prensip nan fason m ap viv.

H. Pilori an enfekte anpil ayisyen jou sa yo, men trete l pou sòti anba konplikasyon li ka pote yo pa difisil depi w pran bonè.