Kijan pou w evite Mal kamyon (mal des transports) epi profite vwayaj ou yo san traka?

Imajine w nan yon vwayaj  li ka nan machin, bato, avyon oubyen tren. Epi w komanse santi w pa byen: wap swè, ou gen vètij, bouch ou ap fè dlo, epi w tonbe vomi, sa ki koz ou mal pase nan vwayaj la. Ou gen mal kamyon , oswa "cinétose" nan lang fransè. Ebyen nan atik sa nou pral wè ki sa ki lakòz li, kijan nou ka evite l e soulaje sentòm yo.

Kisa ki lakòz mal Kamyon an?

Mal Kamyon an vini lè gen konfli ant enfòmasyon je w ba ou ak  enfòmasyon anndan zòrèy ou (se li ki di si kò nou an ekilib) voye bay sèvo w. 

Lè kò nou imobil nan yon veyikil  (machin, bato, avyon, tren) kap deplase sèvo nou resevwa yon sinyal kontradiktwa, je nou di nou an mouvman zòrey nou di nou anplas, sa pètibe fonksyonman l epi li deklanche yon sitiyasyon estrès.

Gen kèk faktè ki kapab favorize mal kamyon an, tankou fatig, estrès, grangou, sant gaz, avèk lè w pa jwenn van. 

Li afekte espesyalman timoun ki gen ant 2 ak 12 lane ak fanm, espesyalman pandan gwosès oswa règ yo.

Kijan ou kapab evite mal kamyon an?

Pou diminye risk pou gen Mal Kamyon ou ka pran kek mezi tou senp:

• avanw vwayaje a, evite manje anpil oswa bwè alkòl;
• pandan vwayaj la, chita yon kote ki konfòtab kap pèmèt ou pran  mwens sekous, epi kap pèmèt ou wè kote w prale a,  tankou bò chofè a,  nan mitan bato a, oubyen bò zèl avyon;
•  evite li ak gade ekran;
•  manje chiklèt oswa sirèt mant, 
•  pote yon braslè "anti-nausée"
• tande ti mizik dous pouw ka detann ou

Jean Marc, yon sitwayen ki konn fè nòdwès ak pòtoprens tap eksplike nou teknik li konn itilize poul evite mal kamyon:

lè m santi mw anvi vomi, mwen eseye bwè yon bagay, epi mw chache yon pozisyon konfòtab nan machin nan epi mwen evite pran sekous yo  jiskaske anvi vomi an pase.

Kijan ou kapab soulaje sentòm mal kamyon yo?

Si malgre tout prekosyon sa yo ou santi sentòm yo  ou ka pran:

• medikaman pou anpechew vomi (Promaz, Loratadine) pa bay li ak timoun ki gen pi piti 2 lane;
• remèd natirèl  kapab edew tou tankou bwè dlo fre, rafrechi visaj ou ak yon sèvyèt mouye,  sirèt mant ak jenjanm ka edew tou;

Ou dwe sonje ke mal kamyon an dwe disparèt aprè vwayaj la oubyen kek èdtan aprè si sentòm yo pèsiste oubyen vin pi grav al wè yon Medsen pou yon evalyasyon medikal apwopriye.

sources:

https://www.vidal.fr/maladies/estomac-intestins/mal-transports-cinetose.html

https://www.acs-ami.com/fr/blog/guide-voyage/mal-des-transports/

https://www.pediakid.com/fr/blog/articles/enfant-mal-transports-comment-soulager